Vor í Vero

Ég held að það sé farið að vora í Vero Beach. Hitinn er núna hættur að fara niður fyrir 25 gráður og oft finnst mér nóg um. Ég verð að viðurkenna að ég er farin að kvíða pínulítið sumrinu því þá eiga hitinn og rakinn víst að vera agaleg. Mér finnst nærri allt fólkið hérna vera fólk að norðan sem hefur flust hingað í sólina eða þá efnað eldra fólk að norðan sem eyðir vetrinum hérna niðurfrá (hinir svokölluðu snowbirds). Ég umgengst lítið af fólki hérna sem eru innfæddir flóridabúar og allir sem ég tala við eiga það sameiginlegt að fara og eyða sumrinu fyrir norðan því hitinn hérna er allt of mikill. Fólk bókstaflega hlær að okkur þegar það heyrir að við séum frá Íslandi og ætlum að eyða sumrinu hérna í Vero, eftir hlátrinum fylgir svo yfirleitt svona "Vúbbs" svipur eins og okkur sé voðaleg vorkunn. Við búum okkur bara undir það að lifa í sundlauginni og blasta AC-ið án afláts.

En að öðru. New York var gríðarlega hressandi og mikið gaman að eyða vikunni með stelpunum í þessari yndislegu borg. Daði auðvitað sást lítið eins og venjulega og eyddi mestum tímanum í vinnunni. Við löbbuðum af okkur fæturnar nokkrum sinnum en notuðum líka lestarnar mikið. Á óskalistanum hennar Birnu var að fara í vaxmyndasafn Madame Tussauds og ég vildi fara á Broadway sýningu en að öðru leiti var tíminn að mestu óskipulagður. Við fórum og skoðuðum 9/11 minningarreitinn þar sem framkvæmdir eru ennþá á fullu. Mér fannst staðurinn alveg magnaður og ótrúlega fallegar tjarnirnar sem gerðar hafa verið þar sem turnarnir stóðu. Við nýttum okkur ókeypist ferðir Staten Island ferjunnar og rúntuðum eina ferð til Staten Island og til baka. Það var líka verslað eitthvað "örlítið" og auðvitað borðað úti eins mikið og við mögulega gátum. Uppúr allri ferðinni stóð þó sýningin Lion King sem við fórum á á Broadway. Algerlega frábær upplifun fyrir alla fjölskylduna og ekki skrítið að ennþá sé verið að sýna þessa sýningu fyrir fullum sal 15 árum eftir frumsýninguna. Við flugum aftur heim til Flórida á laugardagskvöldinu og áttum sunnudaginn í yndislegu næði hérna heima á pallinum. Það er alveg merkilegt hvað maður er fljotur að venjast góða veðrinu því við vorum öll alveg agalega ánægð að komast heim i sólina og sundfötin.

Eftir NY hafa hlutirnir svo dottið í rútínuna aftur og tíminn bara líður og líður. Utan skólans mætir Hanna Sigga í ballettinn sinn og Birna í hestana og á leikæfingar. Ég hjóla og reyni að hlaupa eins og bumban leyfir og Daði minn bara vinnur og vinnur. Um helgar er svo öll fjölskyldan dugleg að gera e-ð skemmtilegt saman eða þá bara liggja í sólinni á ströndinni eða við sundlaugina. Á morgun ætlar Daði að fara með félögum sínum að veiða hérna úti á strönd en það er alveg voðalega vinsælt sport hérna. Ég efast ekki um að þeir eigi eftir að hafa með sér allavegna eitt kælibox fyrir bjór og kannski plastpoka fyrir fiskinn sem veiðist, þó svo það sé örugglega aukaatriði :)

Hanna Sigga sæta á hestavellinum þar sem Birna er að æfa

Birna Flott að læra fullt af hestastöffi

Hanna Sigga klappar Lucie á meðan Birna æfir sig

Svo góð við hana Belle

Við keyptum nokkur fræ til að sjá hversu vel það gengi að láta e-ð vaxa hérna í Flórida

Hanna Sigga sá að mestu um að sá fræjunum

Á innan við viku var sprottin upp þessi líka sæta planta,,, ekkert smá gaman að rækta hérna í Flórida

Daði slappar af eftir vinnuvikuna

Meganæs :)

Við Hanna Sigga fórum út í búð og löbbuðum ströndina til baka. Alls ekki amarlegt

Kominn mars í Vero Beach

Jæja, orðið svolítið langt síðan ég hef skrifað. Ýmislegt búið að gerast þó, eins og t.d þá átti ég afmæli þarsíðasta laugardag og er orðin alveg einu ári eldri :) Við áváðum að halda uppá daginn með því að fara á ströndina með vinafólki okkar og þar áttum við gríðarlega skemmtilegan dag. Við höfðum með okkur fullt af dóti svo enginn þyrfti að láta sér leiðast og það var mokað og lesið og surfað (á búggíbrettinu hennar Hönnu Siggu) og svo í lokin þá grilluðum við pylsur á línuna. Um kvöldið var svo enn ein hverfahátíðin hérna í Vero Beach og þangað létum við okkur auðvitað ekki vanta. Það var búið að loka einni aðalgötunni í bænum og setja upp svið og fullt af matsölustöndum. Tónlistin var reyndar arfaléleg en aðal atriðið var miðaldra kona hérna úr bænum sem söng (einstaklega illa) og spilaði á trompet þess á milli (líka illa). Við reyndum bara að leiða hjá okkur "Mambó Italianó" og "The Wind beneath my wings" með því að kaupa okkur allskonar góðgæti á sölubásunum og gekk það alveg mæta vel :) Á sunnudgainn keyrðum við svo til Palm Beach til að kíkja í voða fína verslunarmiðstöð og þar tókst okkur mæðgum að versla einhver ósköp. Sem sagt alveg hreint fínasta afmælisthelgi :)

Í síðustu viku varð Hanna Sigga veik og var því frá skóla mest alla vikuna. Við fórum svo með hana til læknis þar sem kom í ljóst að hún er með e-ð sem kallast atypical lungnabólga og þurfti hún því að fá pensilín og taka því rólega þar til þetta líður hjá. Maður sem sagt getur orðið veikur þó svo það sé alltaf sól og blíða.

Birna Luna fékk hlutverk í leikriti sem verið er að setja upp í skólanum hennar og hún er voðalega spennt að byrja að æfa. Leikritið heitir Starry Messenger og fjallar um æfi vísindamannsins Galileo Galilei. Hlutverkið hennar er víst bara nokkuð stórt og ég er strax farin að hlakka til að mæta á frumsýninguna í vor :)

Þessa vikuna er spring break bæði hjá Hönnu Siggu og Birnu og því eru þær í frií frá skólanum. Planið er að nýta fríið og fara til New York því við erum svo miklir aðdáendur New York borgar. Daði getur þá bara mætt í vinnuna sína á Wall street á meðan við stelpurnar njótum borgarinnar eins og fínar konur :)

Hanna Sigga leikur sér á leikvellinum á meðan pylsurnar eru að grillast

Íslendingarnir í Vero Beach :)

Afmælisbarnið sjálft

Birna Sæta

Daði grillmeistari

Splunkunýr bíll

Héðan af Almiranta Ln er allt fínt að frétta. Birna Luna er búin að vera núna í rúma viku í nýja skólanum og líkar rosalega vel. Hún er farin að ganga í þessum líka fína skólabúningi (hann er allavegna pínu öðruvísi (: ) og mætir með tablet-ferðatölvu í skólann á hverjum degi. Á morgun er svo skólaferðalag í Disney World þar sem krakkarnir fara í ratleik og hafa skemmtilegt allan daginn.

Í gær loksins keyptum við okkur bíl. Búin að vera á bílaleigubíl frá því við komum og bara ekki nennt að spá í þessu. Það var hisnvegar löngu orðið tímabært þannig að við eyddum stórum hluta undanfarinna daga í að velta fyrir okkur hvaða bíl við ættum að kaupa. Vorum aðallega að velja á milli toyota 4runner, Ford Explorer, Honda Pilot og svo kom volvo sterkur inn. Við enduðum á að kaupa okkur splunkunýjan Honda Pilot, hlaðinn aukabúnaði sem er auðvitað aðal málið :) (það finnst okkur Hönnu Siggu allavegna) Hann er voðalega fallegur og stór og passar vel fyrir svona plássfreka fjölskyldu sem við erum.

Um síðustu helgi fórum við fjölskyldan á hverfahátíð hérna í Vero Beach sem hét því skemmtilega nafni "Florida craft brew and wingfest". Þar gat fólk keypt sér armband inná svæðið og þannig drukkið eins og það vildi af uþb 80 tegundum af bjór. Það voru líka óteljandi matasölustandar þar sem seldur var allskonar matur á einstaklega hagstæðu verði. Daði fékk sér auðvitað bjór en við stelpurnar létum okkur nægja að ryðja í okkur allskonar annarskonar góðgæti. Hanna Sigga virðist vera flott efni í kana því hún hakkaði vængina í sig eins og enginn væri morgundagurin. Vængir ì hinum ymsu útfærslum eru grîdarlega vinsælir hérna ì suðrinu :)

Flotti nýji bíllinn