Aftur kominn mánudagur

Mánudagur númer 3 í Vero Beach og stelpurnar mínar eru báðar í skólanum. Dagurinn í dag er þriðji dagurinn hennar Hönnu Siggu en hingað til hefur bara gengið vel. Hún kann auðvitað ekki orð í ensku og er þess vegna mjög óörugg. Ég bjó til nokkur spjöld sem hjálpa henni að eiga samskipti við kennarann og ég vona svo sannarlega að hún verði einstaklega fljót að læra enskuna.

Á laugardaginn síðasta fóru Daði og Birna Luna uppeftir til Orlando til þess að fara í IKEA og versla það helsta sem vantaði í húsið. Þau leiguð lítinn flutningabíl svo þau gætu komið öllu fyrir sem þurfti og núna er húsið fullt af ikea kössum sem þarf að vinna úr. Ég er alveg komin með hundleið á að setja saman húsgögn :) Húsið er s,s farið að taka á sig mynd eða gerir það allavegna þegar við erum búin að setja allt saman.

Í gær fórum við svo fjölskyldan í dýragarð sem er hérna rétt hjá og áttum stórskemmtilegan dag. Við ákváðum að taka einn fjölskyldudag og ekki gera neitt leiðinlegt (eins og að versla húsgögn eða redda einhverju dóti) og eftir allt sem á hefur gengið undanfarna daga þá var það kærkomið.

Fyrsti skóladagurinn á morgun

Jæja, Hanna Sigga fær að byrja í skólanum á morgun loksins. Hún fór í læknsiskoðunina í dag og fékk auðvitað topp einkunn :) Hún þurfti að fá tvær sprautur sem vantaði uppá til þess að hún væri gjaldgeng í skólana í Florída og svo þurfti hún að fá flensusprey í nefið! Þetta var auðvitað allt alveg hroðalegt fannst henni þó svo það hafi sennilega verið það allra fáránlegasta að þurfa að pissa í glas!! Ég vissi ekki hvert hún ætlaði þegar ég bað hana um að það :) En jújú þetta gekk allt saman upp og að lokum gátum við farið í Beachland Elementary skólann og skráð hana þar (og auðvitað fyllt inn ótal blaðsíður). Hún fékk skólabúning til þess að mæta í á morgun og var nú daman ekki mikið hrifin. Frekar óspennandi einlita buxur/pils og pólóbolur sem líka verður að vera einlita.

Ég get nú ekki sagt að ég sé pollróleg með að fara með hana og skilja hana eftir aleina í skólanum. Óvíst hvort maður sofi yfir höfðu e-ð í nótt :/

Hanna Sigga í "fína" búningnum

Mánudagur númer 2 í Vero Beach

Núna erum við fjölskyldan búin að búa í Vero Beach í rúma viku. Húsið okkar er ennþá sorglega tómt og lífið er ennþá í hálfgerðri upplausn. Birna Luna er þó byrjuð í skólanum en í dag var dagur númer 3 hjá henni í Gifford Middle School. Þrátt fyrir að ég hafi gert mitt besta til að kaupa gleði hennar eftir fyrsta skóladaginn (fórum í mollið og versluðum fyrir alltof mikla peninga) þá hefur hún ekki verið neitt sérlega sátt með nýja skólann. Hún var þó örlítið ánægðari í dag þegar hún kom heim þannig að ég sé smá von um að allt eigi eftir að blessast.

Í dag var ætlunin að fara með Hönnu Siggu í skólann sinn og skrá hana. Það reyndist þó alls ekki vera eins einfalt og það hljómar því í skólanum sem Hanna Sigga fer í er þess krafist að nemendur fari í læknisskoðun áður en þeir byrja í skólaum. Við erum engu að síður með bólusetningaupplýsingar að heiman en neinei,,, engar undantekningar og við þurfum að fá tíma hjá lækni fyrir hana fyrst. Ok finna lækni. Við erum auðvitað ekki komin með heimilislækni ennþá þannig að það var farið í það að reyna að finna einn slíkan. Við hringdum á óteljandi staði þar sem ekki var tekið við nýjum sjúklingum eða þá enginn tími laus fyrr en eftir 2 vikur eða meira áður en við loksins fundum barnalækni sem getur tekið við henni og gert læknisskoðunina á miðvikudaginn. Ég er að vona að greyið litla geti svo byrjað í skólanum strax daginn eftir það því hún er orðin ansi spennt og óþolinmóð.

Það er að rifjast upp fyrir mér frá því við bjuggum í NH hversu rosalegt pappírsflóð er alltaf í kringum allt hérna í Bandaríkjunum. Ég er alveg með bunka af pappírum sem ég þarf að skila inn þegar ég fer með Hönnu Siggu í læknisskoðunina. Bara rúmlega klukkutíma vinna. Mér datt líka til hugar að troða Birnu Lunu í Lacross í skólanum en óaði alveg við 10 bls bunkanum sem ég þarf að fylla inn til þess að sækja um að komst í prufurnar. Alveg sama hvað það er þá er það alltaf amk 5 bls að fylla inní.

Smá blogg fyrir fjölskylduna

Ég ákvað að byrja aftur að halda blogg svona rétt til þess að fjölskyldan og vinirnir heima fái nú smá fréttir af manni héðan úr sólinni. Lofa nú samt ekki neinum rosalegum afköstum ;)